香港足球新闻（2016年4月14日）

<星島日報>

南華亞協首勝?保出線希望

(星島日報報道)戰至亞協盃G組第四輪，南華昨晚終首嘗勝利滋味。陣中廿一歲小將羅曉聰表現活躍兼取得加盟以來第一球，助「少林寺」以2：0擊敗馬爾代夫的馬茲亞，保持出線十六強希望。

昨晚主場出擊的南華佔大部分攻勢，中場小將羅曉聰不惜氣力奔走，努力終有回報，三十五分鐘把握對方門將穆罕默德打手槌不遠，門前快射得手，去季「上山」以來終於開齋。他此後再以「手榴彈」傳予陳肇麒掛射被擋出再回身補中，南華終以2：0取得亞協G組首勝，球員獲每人六千元獎金之餘，亦賺分兼贏球迷掌聲。

不過，「少林寺」四戰一勝三負得三分仍包尾，餘下主場鬥緬甸的仰光聯及作客印度的莫亨巴根必須全勝，方可以次名出線十六強。

<東方日報>

逃過截肢戰勝魔咒超級10號卡路士

港人愛看巴西足球，昨日講完羅拔圖，今日當然輪到卡路士！這位南華新10號未來港先轟動，獲前教練米路吹捧為「超級外援」，然而大半季過後這位森巴中場只算交到貨，早前更因右腳細菌感染幾乎截肢，所謂大難不死必有後福，大步檻過的卡路士極速康復，戰勝「10號魔咒」後表示要把握球季餘下時間為南華爭取錦標。

卡路士於巴甲勁旅國際體育會青訓出身，出道初期已經出國搵食，去過科威特及玻利維亞，4年前重返巴西，季初獲南華前教練米路邀請「上山」。

薛高施丹混合體

10號球衣一向在巴西人心目中地位崇高，卡路士也不例外：「我自小很崇拜薛高，長大後喜歡施丹，兩人都是我模仿對象。」卡路士笑說：「我覺得自己有一半是薛高，另一半是施丹。」加盟南華獲賜10號球衣，卡路士對於有幸穿上10號波衫相當感恩：「感謝球會對我的重視和愛戴，令我比賽時更有動力。」

南華10號仔屢中招 10號仔唔易做，南華更有「10號魔咒」，意思是「少林寺」10號球員每多嚴重受傷，90年代先後有山度士及鄭兆聰「中招」，長期受傷患困擾，卡路士亦難逃厄運，2月中右足踝無故腫脹，上陣期間發燒和嘔吐，往醫院求醫才知病情非常嚴重，他說：「醫生說是細菌感染，若延誤就醫就要截肢了，後來醫生幫我把患處劏開放膿，休息了數星期，幸好已經完全康復。」

聽落都幾得人驚，不過卡路士如今已忘記傷患，只想為球隊作出貢獻：「今次大病令我錯過多場重要賽事，球隊戰績下滑，現在我只想着球隊的事，希望把握季尾機會，為南華爭取錦標。」

卡路士Profile

年齡：33歲

國籍：巴西

位置：中場

（部分相片由受訪者提供）

唔想再失婚帶索妻外闖

長年出外比賽，卡路士可謂身經百戰，但亦因此令首段婚姻失敗收場，今次來港搵食，卡路士攜同第二任嬌妻前來一起生活，以免重蹈覆轍。

卡路士回想道：「我22歲結婚，由於當時足球事業才剛起步，長年在外地比賽，與前妻聚少離多，最終離婚收場，兩名女兒分別11歲及7歲，現在跟前妻一起生活，我不時想念她們。」

卡路士於4年前再婚，現任靚靚嬌妻原來是青梅竹馬的兒時玩伴，很多隊友都以為他太太是名模：「她是我父親好朋友的女兒，我們自小認識，今次遠道來港亦與她同行，她亦很喜歡香港。」

圖/文：黃兆崑

繼續撐香港足球！

各位球迷好呀！我係夢想駿其總監朱偉霖，係呢度首先要多謝各位球迷咁支持呢季嘅港超聯，因為見到好多球迷入場，睇我哋夢想駿其嘅比賽，亦見到好多球迷支持香港足球。

記得喺十幾年前，我踢甲組嘅年代，係香港足球嘅低潮期，直播香港足球好少，報章報道亦好少，入場睇波嘅更加少。我試過有一場比賽只係得4個球迷入場，作為球員，見到咁嘅情況實在覺得好悲哀，因為球員就算花幾多努力、下幾多苦功，都係冇咩人入場睇波，灰！今季我重返職業足球，終於睇到香港人係幾咁鍾意足球呢一項運動，亦比我踢嗰陣多咗好多球迷入場支持，真係好多謝依家為香港足球出力嘅每一個人，亦希望呢一個氣氛可以一路咁延續落去，咁香港足球就會繼續進步。對每個球員或者搞波嘅老闆嚟講，如果冇球迷入場支持，繼續落去都無意思。

最後亦都要多謝今季東網，佢哋為賽事搞宣傳同直播都好落力，希望嚟緊東網同香港足球愈搞愈好，共同努力將香港足球推到最高峰，令香港以外唔同國家及地區嘅人，都可以睇到港超聯，知道香港足球有幾勁！最後，希望各位球圈中人可以繼續喺自己嘅崗位，為推動香港足球努力，多謝大家！

專欄輪住嚟‧

夢想駿其總監 朱偉霖

<蘋果日報>

體壇拾趣：南華開齋保出線希望

終於開齋！南華噚晚喺旺角大球場嘅亞協盃G組迎戰馬爾代夫嘅馬茲亞，憑羅曉聰同陳肇麒上半場嘅入波，以2:0擊敗對手，今屆連輸三場後終於識贏波，總算冇令1,254位冒雨入場支持嘅球迷失望。

賽前喺亞協一分都未有嘅南華，要保持出線希望，呢場非勝不可。雖然澳洲射手賴恩格菲斯因病缺陣，但擔正嘅小將林學曦同羅曉聰表現冇令大家失望。其中羅曉聰喺左路表現活躍，雖然15分鐘窄位起腳斜出，但35分鐘就把握客隊門將穆罕默德拍出個波唔遠，輕鬆射入空門，幫球隊開紀錄。42分鐘，陳肇麒仲接應車潤秋嘅手榴彈，轉身射個靚波，幫南華半場領先2:0。 下半場雨勢越來越大，南華繼續強攻，但運氣就差啲。51分鐘，林學曦接應傳中禁區頂撞射，可惜中楣彈出；七分鐘後，佢頭槌攻門又中柱，慘成「柱男」！不過，南華總算保住2:0勝局，全取三分，雖然仲排緊榜尾，但叫做保住出線希望。同組另一場仰光聯主場同莫亨巴根踢成1:1，後者以10分繼續排榜首。

<文滙報>

南華亞協盃終開勝門

香港文匯報訊（記者 潘志南）亞協盃G組賽事昨日於旺角場舉行，港超球隊南華主場以2:0擊敗馬爾代夫球隊馬茲亞，終於打開勝利之門；贏波後的南華目前在G組4戰得3分，只落後排第2的緬甸仰光聯兩分，爭取出線仍未絕望。

儘管已在G組分組賽3戰全敗，南華將帥強調不會放棄，後防主力陳偉豪與巴西中場卡路士今季首次於亞協盃正選登場，而保贊則任隊長一職鎮守防線，陳肇麒、艾華、卡路士、林學曦、羅曉聰正選負責攻堅。

今仗雨戰對於客隊影響甚大，而主場出戰的南華一開始就佔主動，埋門亦較多；戰至35分鐘，艾華左路傳中，對方門將將皮球打出不遠，門前的羅曉聰左腳射入，為南華打開紀錄。7分鐘後，南華由陳肇麒於禁區左腳轉身妙射入網，為南華贏到兩球，亦打下贏波基礎。 換邊後，林學曦先後射中楣、頂中柱，兩度錯失為南華增添紀錄的黃金機會；最終雙方直到終場都未能把比數改變，南華以2:0主場贏波。